Miangkon si Senate President Pro Tempore Panfilo “Ping” Lacson nga adunay subling bug-at nga baylo ang pagbarog niini batok sa korapsyon, tungod nagkainit ang imbestigasyon sa Senate Blue Ribbon Committee sa gikaingong mga anomalya sa mga proyekto sa flood control.
Matud ni Lacson, isip chairman sa Blue Ribbon Committee, aduna matud pa kini mga higala nga galayo na ang panimuot kaniya ug aduna na matud pa kini bag-ong mga kaaway samtang nag-imbestigar ang komite sa mga ebidensya sa maong korapsyon.
Gitawag pa kini sa Senador nga “Deja vu”, nga matud niini susama sa nasinati niini kaniadtong 2003 dihang gipasiugdahan ang pagbasura sa pork barrel system sa privilege speech niini nga “Living Without Pork.”
Sa usa ka pamahayag, si Lacson miluwat nga nasayod kini sa posibleng personal ug politikanhong epekto sa higayon nga gidawat ang pagka-Chairman sa komite.
Sumala niini, ang imbestigasyon sa gikaingong mga anomalya sa flood control projects maoy usa sa labing sensitibong isyu nga giatubang sa Senado sa pagkakaron, tungod daghang mga mambabalaod ug mga dagkong opisyal sa gobyerno ang mahimong malambigit.
Bisan pa niini, gibarugan sa Senador nga magpabilin nga nakatutok sa mga ebidensiya ug mandato sa komite.
Matud pa, nga wala kini nagmugna og mga istorya o naglambigit ni bisan kinsa sa nagpadayon nga imbestigasyon, apan gisunod lamang nini ang mga ebidensya ug gipasiugda nga limpyo ang konsensya.
Samtang, sumala ni Lacson nga dili na kini bag-o sa maong sitwasyon, apan sama kaniadtong 2003, andam kining atubangon ang mga sangpotanan, basta ang kamatuoran ug pagkamay-tulubagon ang mopatigbabaw.