5-anyos nga bata ug amahan, nakauli na Minnesota human mabilanggo sa ICE detention center

Nakauli na sa ilang panimalay sa Minneapolis ang lima ka tuig nga bata nga si Liam Conejo Ramos ug ang iyang amahan nga si Adrian Alexander Conejo Arias human sila gipagawas sa ICE detention sa Texas.

Sumala kang Texas Congressman Joaquin Castro, gipagawas ang mag-amahan gikan sa Dilley detention center human sa emergency order ni US District Judge Fred Biery, nga mibatikos sa pagkadetain sa bata ug nanawagan og mas tawhanong proseso sa immigration.

Gibarugan sa abogado sa pamilya nga legal nga misulod sa US ang mag-amahan niadtong 2024 pinaagi sa CBP One app ug misunod sa tanang asylum procedures, atol sa pakigtagbo kang Minnesota Congresswoman Ilhan Omar human sa ilang pag-uli.