Nahimong mabungahon ang pakigpulong nila Special Assistant to the President for Investment and Economic Affairs Secretary Frederick Go ug US Trade Representative Jaime Greer, diin ilang gihisgutan ang mga potensyal nga kasabutan aron mapalig-on ang relasyon sa kalakalan tali sa Pilipinas ug Estados Unidos.
Gisundan kini human ipatuman sa Washington ang 17% nga reciprocal tariff sa mga produkto nga mogikan sa Maynila. Matod ni Sec. Go, naipasa sa Philippine delegation ang tanang kabalaka nga gipasabot kanila sa mga stakeholders gikan sa export industry sa nasud. Pipila sa mga espesipikong industriya nga ilang gihisgutan mao ang semi conductor ug electronic industry, ilabi na kay kini ang nag-una nga export industry sa nasud padulong sa Amerika.
Gisundan kini sa coconut industry, ingon man sa garment, furniture, ug food processing industries. Sumala sa kalihim, ilang naipresentar ang tanang isyu nga malipayong gipaminaw sa mga representante sa Estados Unidos. Sa pagkakaron, nagtukod na og technical working group ang Department of Trade and Industry (DTI) aron mututok sa nahimong negosasyon. Samtang ,mibalik si Sec. Go sa pagdumili sa paghayag sa ilang inisyal nga napagkasabutan tungod kay kini ilawom sa confidential agreement.