Usa ka talagsaon ug “world-class” nga gasa ang gihatag sa musikero ug creative entrepreneur nga si Philip Halloun alang sa unang birthday sa iyang anak nga si William.
Nakab-ot ni Halloun ang Guinness World Record alang sa “most languages featured on a music single” human niya gisulat ug gi-record ang kantang “I Love You,” nga naglangkob sa maong hugpong nga adunay 521 ka lain-laing pinulongan.
Nalabwan niini ang nauna nga rekord nga 398 ka pinulongan nga natala niadtong 2024 sa usa ka artist gikan sa India.
Dili random ang pagpili sa numerong 521 tungod kay tinuyo kini ni Halloun isip tribute sa adlawng natawhan sa iyang anak nga Mayo 21 (5/21).
Bisan pa man nga pipila ra ka pinulongan ang iyang nahibaloan sama sa Danish, English, ug Arabic, maampingon niyang gitun-an ug gigamitan og translation tools ang gatusan ka pinulongan aron masiguro nga hapsay ug “fluid” ang paglitok sa matag pulong.
Sumala sa 41-anyos nga amahan, ang tono sa gitara sa kanta iya mismong orihinal nga komposisyon ug kanunay na niyang ginatugtog bisan sa wala pa matawo si William.
Ang maong proyekto nagsilbi isip simbolo sa iyang debosyon ug usa ka mensahe nga higugmaon ang anak sa bisan unsang pulong, ug panahon.