Andam na ang Pilipinas nga mahimong regional powerhouse sa smart ug sustainable nga mga industriya pinaagi sa mas sayon nga pagproseso sa negosyo, matod sa Board of Investments (BOI).
Gipadayag kini sa Board of Investments (BOI) sa ASEAN Green Investment Catalyst (AGIC) launch sa Bangkok, Thailand, diin gisuportahan sa ASEAN-UK Green Transition Fund ang paningkamot sa rehiyon nga mapadali ang green investments.
Pinasikad sa Executive Order No. 18, gilunsad ang green lane program nga nagtumong sa pagpasayon, pagpapaspas, ug pag-automate sa permit ug license processing alang sa mga estratehikong proyekto.
Sukad 2023, 203 ka proyekto na ang naendorso ubos sa green lane status nga nagkantidad og ₱5.17 trilyon, ug gibanabana-ang makahimo og kapin 300,000 ka trabaho sa nasud.
Gitinguha sa Pilipinas nga makig-partner sa ubang nasud aron suportahan ang mga proyekto nga nagpanalipod sa kalibutan, nagtukod og green cities, ug nagpalambo sa malungtarong kauswagan.
Target usab sa nasud nga mahimong host sa sunod ASEAN Investment Forum ug mangulo sa ASEAN sa 2026.