Mukabat sa dul-an P110,000 ang kantidad sa illegal nga droga nga shabu nga nakumpiska sa sunod-sunod nga anti-illegal drugs operations sa Valencia City, Bukidnon.
Sa Disyembre 15, 2025 alas 8:48 sa gabii, nagpahigayon og buy-bust operation ang kapulisan sa Purok 6, Barangay Tongan-tongan, og miresulta sa pagkasikop sa 44-anyos nga lalaki nga si alyas “Bobords.”
Nakuha sa maong operasyon ang walo (8) ka pakete sa gituohang shabu, P500.00 nga marked money, usa ka cellphone, ug pitaka.
Gibanabnang mutimbag sa 10.6 gramos nga shabu ang nakumpiska nga nagkantidad og P72,080.
Samtang, ning adlawa, Disyembre 16, 2025 alas 12:32 sa kaadlawon, laing operasyon usab ang gihimo sa Purok 2, Barangay Batangan, nga miresulta sa pagkasikop sa usa ka 37-anyos nga lalaki alyas “Jun-Jun.”
Nakuha gikan niini ang upat (4) ka pakete sa gituohang shabu, P500.00 nga marked money, ug usa ka cellphone.
Gibanaban nga mutimbang sa 5.5 gramos nga shabu ang nakumpiska nga nagkantidad og P37,400. Giandam na ang kaso batok sa mga dinakpan alang sa paglapas sa Comprehensive Dangerous Drugs Act of 2002.
Ang mga naaresto karon anaa na sa kustodiya sa Valencia City Police Station, samtang ang mga nakumpiskang droga gidala na sa Provincial Forensic Unit alang sa laboratory examination.