Gipahibalo ni Department of Public Works and Highways (DPWH) Secretary Vince Dizon nga tulo ka indibidwal nga nalambigit sa maanomalyang flood control projects sa Bulacan posibleng mag-Pasko sa prisohan. Sumala ni Dizon, kumpiyansa kini nga madakpan dayon ang mga suspetsado tungod kay non-bailable ang kaso.
Ang mga gikasuhan mao si kanhing DPWH Bulacan 1st District Engineer Henry Alcantara, Assistant District Engineer Brice Hernandez, ug kontraktor nga si Sarah Discaya. Ang tulo kabahin sa unang pormal nga reklamo nga gisumite sa DPWH sa Office of the Ombudsman niadtong miabayng bulan, nga naglakip sa siyam ka flood control projects nga nagkantidad og P249 milyon sa lain-laing lugar sa Bulacan.
Gipadayag usab sa Independent Commission for Infrastructure (ICI) nga natun-an sa Anti-Money Laundering Council (AMLC) ang kapin P5 bilyon nga konektado sa korapsyon nga natago sa 2,800 ka bank accounts.
Gipangulohan ni ICI Chair Andres Reyes Jr. ang paningkamot sa inter-agency aron mabawi ang nawala nga pondo sa katawhan ug pasakaan og kaso ang mga nalambigit sa maanomalyang proyekto.
Matod ni Dizon, kini pa lang ang sinugdanan sa pagpaningkamot batok sa korapsyon sa DPWH ug ilang padayonong ipasaka ang kaso sa tanan nga opisyal ug kontraktor nga nalambigit sa pagpangawat sa pondo sa gobyerno.