Gisapubliko na sa upat sa 24 ka senador ang ilang Statement of Assets, Liabilities, and Net Worth o SALN. Una nga boluntaryong nagpagawas sa iyang kinatibuk-ang bahandi si Senadora Risa Hontiveros, nga adunay net worth nga mukabat sa P19 milyon, gisundan kini ni Senador Robinhood Padilla nga adunay P244 milyon, ug ni Senate President Vicente Sotto III nga adunay P188.9 milyon.
Ang ika-upat mao si Senador Sherwin Gatchalian, nga adunay P89.5 milyon nga kinatibuk-ang bahandi apan walay gi-report nga mga utang o liabilities.
Base sa dokumento, adunay duha ka residential condominium units si Gatchalian nga nagkantidad og P40.1 milyon, ug personal nga kabtangan nga naglakip sa shares of stock, cash in bank, ug motorsiklo nga nagkantidad og P49.3 milyon.
Nakabutang usab sa iyang SALN ang iyang mga business interests diin siya usa ka shareholder sa lima ka kompanya, apan wala siya kini gideklarar nga asawa o anak nga menor de edad.
Lakip sa iyang mga paryente nga nagserbisyo sa gobyerno ang iyang mga igsoon nga sila DSWD Secretary Rex Gatchalian ug Valenzuela Mayor Wes Gatchalian.
Sa laing bahin, gipagawas na usab ni Senate President Vicente Sotto III ang iyang SALN, diin mikabat sa P188,868,123.40 ang kinatibuk-ang kantidad sa iyang bahandi. Gireport niini nga ang kantidad sa iyang mga real property mikabat sa P335.17 milyon, lakip ang tulo ka balay ug yuta, duha ka condominium unit, duha ka residential lot, ug usa ka agricultural lot.
Ang mga personal properties niini nagkantidad og P130.4 milyon, samtang ang iyang mga utang anaa sa P276.7 milyon. Misaka kini sa kapin P103 milyon sulod sa lima ka tuig, gikan P85.6 milyon niadtong 2020.
Si Sotto, nga nailhan usab nga regular host sa usa ka noontime show, nagdeklara nga aduna siyay walo ka paryente nga nagtrabaho sa gobyerno.