Gipasakaan og kasong Grave Threat ang onse (11) ka mga indibidwal human madakpi sa operasyon nga gipahigayon sa kapulisan ug militar sa Barangay Capitan Angel, Malaybalay City.
Nasikop sa operasyon ang mga suspetsado nga sila Niño Tahud Taboclaon, Abel Bingas Tahud, Rico Penuhan Baculio, Richard Abrasado, Dante Sicosana Enricoso, Elizar Edaon Tahud, Brandon Tahud Dawitan, Angelbert Montebon Tahud, Joshua Cayamban Ayoc, Marcos Idaon Tahud, ug Richie Tulusan Lugnasan.
Lakip usab sa mga nadakpan ang usa ka 15-anyos nga menor de edad nga lalaki, nga i-turn-over sa Department of Social Welfare and Development (DSWD).
Narekober usab sa maong operasyon ang lima (5) ka armas de fuego, mga bala, ug unom (6) ka bladed bolo.
Base sa imbestigasyon, alas 1:00 sa hapon kagahapong adlawa, ang grupo sa mga suspetsado sakay sa usa ka trak misangpot sa ranch o ancestral domain nga gipuy-an sa magtiayon nga sila Zimo Saranga Gunayan, 57 anyos, ug Racquel Gunayan, 67 anyos, pulos mga mag-uuma ug residente sa Purok 4, Barangay Capitan Angel.
Didto, gihulga sa mga suspek ang magtiayon nga mobiya sa ilang yuta samtang naghupot og armas. Human sa pagpanghulga, nadungog sa mga biktima ang pagpabuto sa armas, hinungdan nga ilang gitawagan ang mga kapulisan sa Malaybalay CPS aron mangayo og tabang ug nasikop kini.
Ang mga dinakpan ug nakumpiska nga mga armas anaa na sa Malaybalay CPS alang sa pormal nga proseso ug dokumentasyon.
Mag-atubang karon sa kasong Grave Threat ug paglapas sa Republic Act 10591 o ang Comprehensive Firearms and Ammunition Regulation Act ang mga dinakpan.
Kahinumdoman nga nasikop ang mga dinakpan kagahapong adlawa, Oktubre 9, 2025, alas 2:30 sa hapon.