Nasikop ang suspetsado nga usa ka aktibong pulis human gitulis ang 7/11 Convenience Store sa Purok-13, Brgy. Damilag, Manolo Fortich, Bukidnon sa kaadlawon sa Agosto 5, 2025.
Sa pakighinabi sa Bombo Radyo Malaybalay, gipadayag ni PMAJ. Jayvee Babaan, tagpamaba sa Bukidnon Police Provincial Office 10, nga pasado alas 6:45 sa buntag nadawat sa Manolo Fortich Municipal Police Station ang tawag sa tag-iya sa tindahan, usa ka 59-anyos nga negosyante gikan Brgy. Tankulan. Matud pa sa imbestigasyon, nakita sa cashier nga pabalik-balik ang suspetsado sa gawas sa tindahan sa dili pa misulod, namalit kani sa maong tindahan dayong mideklarar og tulis.
Nakuha sa suspetsado ang kapin o kulang ₱12,000 nga kantidad nga kita sa tindahan. Gikumpirma sa kapulisan nga kini usa ka hingkod nga miyembro sa PNP nga nakadestino sa Malaybalay City Police Station.
Gikatahong adik kini sa sugal, nga posibleng hinungdan sa pagbuhat sa krimen. Gipasalig ni PMAJ. Babaan nga dili nila pagatugutan ang mga pulis nga mobuhat og krimen, ug angay manubag kini sa balaod. Padayon ang imbestigasyon samtang pagapasakaan ang suspetsado sa kasong robbery, lakip na usab ang pagtangtang sa iyang pwesto.