Mi-apela si Atty. Israelito Torreon sa mga Senador nga ikonsiderar ang kaugmaon sa nasod kung ipadayon nila ang plano nga botohan sa sunod semana ang desisyon sa Korte Suprema kabahin sa impeachment complaint batok kang Bise Presidente Sara Duterte.
Si Torreon usa sa mga abogado nga magpasaka og petisyon sa Korte Suprema aron kuwestyunon ang legalidad sa maong complaint, nga gipaboran sa ulahi sa kataas-taasang hukuman.
Matod ni Torreon, walay makapugong sa mga Senador diin ilang buot nga botohan og ipadayon ba o dili ang impeachment trial batok sa bise presidente.
Apan angay usab nilang tan-awon ang epekto niini sa nasod, diin ang ilang buhaton o ang resulta niini mahimong mosangpot sa usa ka constitutional crisis nga makahatag og daghang problema sa Pilipinas.
Bisan pa nga mahimo kining numbers game kung ipadayon sa Senado, nagtuo si Torreon nga ang mga Senador angay nga maghunahuna pag-ayo sa mga posibleng sangputanan sa ilang lihok.
Gikatakda nga hisgutan sa Senado ang maong isyu karong Agosto 6. Giila ni Atty. Torreon nga katungod sa matag Senador ang pagboto base sa ilang prinsipyo sa maong botohan, apan kumpiyansa siya nga kasagaran sa mga Senador nakasabot sa gahum sa Korte Suprema sa paghubad sa mga probisyon sa Konstitusyon.
Dugang pa niya, kumpiyansa siya nga ang kadaghanan sa mga Senador mas mopili nga sundon ang desisyon sa Korte Suprema kaysa ilang personal nga pagtan-aw.