Ang prosekusyon nagpahayag nga ang mga testigo sa depensa ni Bise Presidente Sara Duterte pakyas pagtubag sa sentro nga alegasyon sa Article II sa impeachment complaint, ilabi na ang P1.5 bilyon nga kadudahan nga transaksyon.
Kini ang gipunto ni House Prosecution Spokesperson Representative Zia Alonto Adiong, kinsa nag-ingon nga layo ra sa sentro nga isyu ang ilang mga testimonya.
Matud ni Adiong, ang pangunang kinahanglan tubagon mao ang giingong dili husto nga deklarasyon sa mga kabtangan sa Bise Presidente.
Apil usab ang mga kahina-hinalang transaksyon nga hapit moabot sa P1.5 bilyon, nga gi-flag sa Anti-Money Laundering Council (AMLC).
Kahinumduman nga sa ika-45 nga adlaw sa impeachment trial niadtong Biyernes, Nobyembre 20, duha ka testigo ang mitungha alang sa depensa.
Si Department of Trade and Industry (DTI) Undersecretary Ceferino Rodolfo ang unang mitestigo.
Naghisgot siya bahin sa pagparehistro sa Cale88 Foods Corporation isip usa ka export enterprise ubos sa Board of Investments (BOI), lakip na ang mga permit ug sertipikasyon niini.
Gisundan kini ni Food and Drug Administration (FDA) Director IV Pilar Marilyn Pagayunan.
Si Pagayunan nagpresentar og mga dokumento kalabot sa rehistrasyon sa banana chips nga gihimo sa maong kompanya.
Apan alang kang Adiong, walay igong katin-awan ang gipakita sa mga testigo bahin sa mga remittance nga misulod sa corporate bank accounts sa mga kompanya nga nalambigit sa isyu.
Partikular nga gipahayag ni Adiong nga ang testimonya ni Rodolfo nagtutok lamang sa pagkuha sa Cale88 og mga permit ug sertipikasyon aron makalihok isip export enterprise.
Samtang ang presentasyon ni Pagayunan nagtuyok lang sa rehistrasyon sa banana chips sa kompanya.
Alang kang Adiong, wala kini makatubag sa mga pangunang pangutana sa Article II.
Ilabi na ang mga alegasyon bahin sa mga kabtangan sa Bise Presidente, ang giingong dili husto nga deklarasyon niini, ug ang mga kahina-hinalang transaksyon nga gipunting sa prosekusyon.
Gilauman nga mobalik ug magpadayon ang impeachment trial sa Disyembre 1.
Kini human dili madayon ang naunang gikatakda nga mga pagdungog niadtong Nobyembre 26 ug 27 tungod sa giingong dili pagka-available sa sunod nga mga testigo sa depensa.

