Gikasubo sa kadaghanan ang pagtaliwan sa sikat nga hippopotamus nga si Fiona samtang anaa kini sa Cincinnati Zoo sa Estados Unidos.
Matud sa Cincinnati Zoo Director nga si Dave Jenike, aksidente matud pang natulon ni Fiona ang usa ka kalo nga nahulog sa iyang gipuy-an.
Gibutyag ni Jenike nga nakurat ug naguol sila sa pagkamatay sa siyam ka tuig nga hippopotamus.
Gisusi pa kini sa mga beterinaryo ug gioperahan ang hayop nga mitimbang og kapin sa 2,000 ka libra, apan wala na kini masalbar pa human sa pipila ka oras.
Nahimong sikat sa tibuok kalibotan si Fiona human kini matawo nga unom lamang ka semana niadtong 2017, nga mitimbang lamang og 29 ka libra.
Layo kini sa kasagarang timbang sa bag-ong panganak nga hippopotamus nga mokabat og 100 ka libra.
Nagtinabangay ang mga kawani sa zoo aron matabangan si Fiona sa paglakaw ug pagkaon hangtod nga mi-normal ang kahimtang niini.
Tungod sa iyang kasikat, kanunay nga nagpaambit ang zoo og mga litrato ug video ni Fiona sa social media, nga nakadani og daghang fans gikan sa nagkalainlaing bahin sa kalibotan.

