Gipahimangnoan sa Bukidnon Provincial Medical Center (BPMC) ang publiko nga mag-amping batok sa mga sakit sama sa trangkaso, dengue, ug heat stroke, ilabi na sa nag-usab-usab nga kahimtang sa panahon ug nagkainit nga temperatura dala sa El Niño.
Sumala kang BPMC Chief of Hospital Dr. Miguel Antonio Prantilla, kasagarang gipangdala sa ilang balay-tambalanan karon ang mga pasyenteng adunay trangkaso, kalibanga, pulmonya, ug dengue, samtang nagpadayon usab ang mga kaso sa komplikasyon sa kasingkasing, diabetes, ug stroke.
Gipasabot ni Dr. Prantilla nga moubos ang resistensya sa lawas tungod sa kausaban sa panahon hinungdan nga dali kining mataptan og mga sakit, busa gitambagan niya ang katawhan nga magpabiling hydrated, likayan ang dugay nga pagbulad sa kainit sa adlaw, mag-ehersisyo, ug mokaon og masustansyang pagkaon.
Andam na usab ang BPMC sa pag-atiman sa mga posibleng biktima sa heat-related illnesses pinaagi sa mga pamaagi sa pagpabugnaw, apan gipasiugda sa ospital nga mas mahinungdanon ang paglikay kaysa maghulat pa nga masakit.

