Mukabat sa kapin ₱1 milyon ang kantidad sa gituohang shabu nga nakumpiska sa kapulisan atol sa buy-bust operation nga miresulta sa pagkadakop sa duha ka giingong drug personality sa Barangay Sta. Ana, lungsod sa Tagoloan, Misamis Oriental, pasado alas-11:00 sa gabii niadtong Nobyembre 17, 2026.
Giila ang mga nadakpan nga sila si alyas “Agalon,” 24 anyos, ug alyas “Insik,” 50 anyos, nga susamang residente sa maong lugar.
Narekober gikan kanila ang gibana-banaang 150 gramos nga gituohang shabu nga nagkantidad og ₱1,020,000, base sa standard drug price, lakip ang gigamit nga buy-bust money.
Gipahigayon ang operasyon sa Regional Police Drug Enforcement Unit (RPDEU) Team 1 kauban ang ubang yunit sa kapulisan. Giatubang sa duha ang kasong paglapas sa Sections 5 ug 11, Article II sa Republic Act 9165 o Comprehensive Dangerous Drugs Act of 2002.

