Nakaapekto sa operasyon sa Bukidnon II Electric Cooperative, Inc. (BUSECO) ang mga hagit sa suplay sa kuryente, ilabina ang pagsalig sa coal isip nag-unang tinubdan sa elektrisidad samtang limitado ang produksiyon sa renewable energy sama sa hydro.
Matud ni BUSECO General Manager Christopher A. Dulfo, misaka ang generation charge sa bayranan sa kuryente niadtong Oktubre tungod sa mga kausaban sa gasto sa produksiyon ug importasyon sa suplay.
Gipasabot usab niya nga ang paggamit sa kuryente panahon sa El Niño mahimong makaapekto sa konsumo sa mga konsumidor.
Sa pagpasabot niini, giingon ni Dulfo nga panahon sa El Niño, mahimong mokunhod ang produksiyon sa renewable energy sama sa hydro, hinungdan nga mas mosalig ang suplay sa coal ug uban pang tinubdan nga naapektuhan usab sa gasto sa importasyon.
Gipasiugda usab sa opisyal nga dili malikayan nga maapektuhan ang bayranan sa kuryente tungod sa pagsaka sa generation charge, busa giawhag ang mga konsumidor nga magmatngon sa paggamit sa elektrisidad aron malikayan ang sobra nga konsumo.