Milupad na paingon sa Puerto Rico si Miss Universe Philippines 2026 Bea Millan-Windorski human sa iyang send-off ceremony sa NAIA Terminal 1, dala ang suporta ug paglaom sa katawhang Pilipino.
Sa wala pa ang iyang pagbiyahe, gipakita ni Bea ang iyang Filipiniana-inspired outfit nga nagsimbolo sa kalig-on ug dignidad sa kababayen-an sa Pilipinas, lakip ang kadato sa kulturang Filipino.
Matud ni Bea sa iyang social media post, “The Filipino is worth fighting for.”
Si Bea ang morepresentar sa Pilipinas sa ika-75 nga edisyon sa Miss Universe nga ipahigayon sa Puerto Rico sa Nobyembre 24.
Kahinumduman kataposang naangkon sa Pilipinas ang korona niadtong 2018 pinaagi kang Catriona Gray, nga ika-upat nga Pilipinang nakadaog sa maong prestihiyosong kompetisyon.