Human sa halos tulo ka dekada nga panaw nga naglakip sa grabeng kalisdanan ug mga peligro, malampusong nakabalik sa iyang pamilya sa Britain ang 56-anyos nga si Karl Bushby, nga giila nga unang tawo nga nakatuyok sa kalibotan pinaagi lamang sa paglakaw.
Nagsugod ang talagsaong panaw ni Bushby niadtong Nobyembre 1998 gikan sa habagatang bahin sa Chile, nga may tumong nga matabok ang mga kontinente ug makabalik sa iyang yutang natawhan nga dili mosakay og sakyanan.
Sa milabay nga 28 ka tuig, mikabat sa 36,000 ka milya ang iyang gilakaw, nga mitabok sa upat ka kontinente ug 29 ka nasud. Apan, dili hapsay ang iyang panaw tungod sa nagkadaiyang pagsulay nga iyang giatubang.
Lakip niini ang pagkadakop kaniya sa Russia human gidudahang espiya, engkwentro sa usa ka polar bear, hulga sa pagpusil ug pagkaguba sa iyang gigamit nga kariton sa pagdala sa mga gamit.
Bisan pa sa mga babag, wala moundang si Bushby hangtod nga naabot niya ang kataposang bahin sa iyang panaw gikan sa Hull City Hall padulong sa pinuy-anan sa iyang inahan.
Nahimong emosyonal ang ilang panagkita tungod kay unang higayon kini nga nagkita pag-usab ang mag-inahan sulod sa 28 ka tuig.
Mitambong usab sa maong panagtapok ang German filmmaker nga si Werner Herzog, nga nagplano sa paghimo og dokumentaryo kabahin sa talagsaong panaw ni Bushby.
Ang iyang kasinatian nagpamatuod nga ang usa ka dakong damgo, bisan pa og molungtad og mga dekada, mahimong maabot pinaagi sa pagpadayon bisan taliwala sa labing lisod nga mga pagsulay.