Pokus ang atensyon ni Pinay tennis star Alex Eala sa hard court season, human sa kampanya sa Wimbledon Championships.
Bisan napakyas ang resulta sa iyang performance sa Wimbledon, naglaum si Eala nga makaduwa na usab siya sa grass courts sa maong Grand Slam sa sunod tuig.
Matud sa post ni Eala, adunay daghan pang opurtunidad ug dili mawad-an sa kadasig.
Tumong ni Eala nga makasulod direkta sa main draw sa prestihiyosong US Open nga ipahigayon sa New York karong Agosto.
Sugdan ni Eala ang iyang kampanya sa hard court pinaagi sa pag-apil sa W1000 National Bank Open nga pagahimoon sugod Hulyo 26 hangtod Agosto 7 sa Montreal, Canada.
Usa kini ka dako nga torneo nga salmutan sa mga maayung tennis players sa kalibutan, lakip na ang Top 4 players nga sila Aryna Sabalenka sa Belarus, Coco Gauff ug Jessica Pegula sa Amerika, ug Iga Swiatek sa Poland.
Gitinguha ni Eala nga masundan ang iyang impresibong kampanya sa Miami Open diin iyang napildi ang tulo ka Grand Slam champions, lakip na si Swiatek.
Napildi usab niya ang reigning Australian Open champion nga si Madison Keys sa Amerika ug si Jelena Ostapenko sa Latvia.
Sa padayon nga pag-uswag sa ranking ni Eala sa WTA, posible kini nga makakuha og automatic ticket ngadto sa main draw sa US Open nga ipahigayon sugod Agosto 24 hangtod Setyembre 7 sa Queens, New York.
Sa kasamtangan, si Eala anaa sa ika-56 nga pwesto sa WTA ranking.
Kahinumduman nga napakyas kini sa main draw sa US Open niadtong miaging tuig human siya mapildi sa final round sa qualifying tournament.
Hanas na si Eala sa hard court, diin nakaangkon kini og US Open juniors title niadtong 2022.