Suportado sa nagkalainlaing ahensya ug organisasyon ang umaabot nga Dugong Bombo 2026 nga ipahigayon sa Nobyembre 14, 2026, nga nagdala sa temang “A Little Pain, A Life to Gain.”
Gipasalig ni 8th Infantry Battalion Commander LtCol. Jeorge R. Jallorina ang padayong suporta sa ilang yunit sa mga programa ug kalihokan sa Bombo Radyo Malaybalay, lakip na ang Dugong Bombo, kutob sa ilang makaya.
Samtang, mipasalig usab ang National Food Authority (NFA), pinaagi kang Gabrielle Lorraine C. Danao, nga moapil sa maong kalihokan tungod kay adunay mga empleyado niini nga andam mohatag og dugo ug motabang sa nanginahanglan.
Giawhag usab ni Michael P. Magdua, estudyante sa Bukidnon State University, ang mga estudyante, magtutudlo ug kawani sa unibersidad nga moapil sa bloodletting activity, ug gipasalig ang suporta sa Community Development Department sa pagpangita og mga blood donor.
Dugang niini, giawhag ni Shayne Caipan, kawani sa Department of Science and Technology (DOST) Provincial Science and Technology Office-Bukidnon ubos sa Project SARAI Capacity Development, ang publiko nga moapil ug modonar og dugo alang sa Dugong Bombo 2026.
Gipunting sa mga representante nga pinaagi sa panaghiusa ug pagtinabangay, makatampo ang matag ahensya ug organisasyon sa pagluwas sa kinabuhi sa mga nanginahanglan og dugo.