Gibutang sa hagit ang kapulisan sa Bukidnon nga mapadayon ang kalinaw ug seguridad sa probinsya panahon sa Undas, ilabina sa posibleng pagdagsa sa mga tawo sa sementeryo, terminal ug mga pasyalan.
Matud ni P.Col. Ariel Philip Pontillas, Deputy Director for Operations sa Bukidnon Police Provincial Office (BukPPO), gipakatap na ang mga personnel sa mga lugar nga gipaabot nga panagtigoman sa publiko aron malikayan ang bisan unsang insidente sa krimen.
Bisan pa sa pag-angkon sa kapulisan nga mikunhod ang crime index sa probinsya, nagpabilin ang panginahanglan sa hugot nga pagbantay tungod sa mga insidente sa pagpamusil ug uban pang krimen nga ilang giatubang.
Gibutyag ni Pontillas nga ang pagkunhod sa crime index resulta sa ilang operasyon ug suporta sa komunidad.
Samtang, giawhag sa opisyal ang publiko nga dili lang magsalig sa presensya sa kapulisan kondili makigtambayayong usab pinaagi sa pagreport sa mga kahimtang nga mahimong hulga sa kalinaw ug kahusay.