Padayon sa pag-andam ang House prosecution panel alang sa posibleng mga ebidensiya nga ipresentar sa kampo ni Bise Presidente Sara Duterte sa pagpadayon sa impeachment trial sa Nobyembre 9, sumala kang House prosecution panel spokesperson ug lead manager Rep. Robert Ace Barbers.
Matud ni Barbers, gitahod sa prosecution panel ang katungod sa depensa nga mopresentar og mga saksi ug ebidensiya, apan nagduda siya sa ihap sa mga saksi nga ilang ipatawag tungod kay ang uban posibleng may kalabotan sa mga artikulo sa impeachment nga wala na ipadayon.
Gipatin-aw usab ni Barbers nga ang mga alegasyon batok kang Duterte gibase sa mga dokumento ug ebidensiyang gisumite sa impeachment court, lakip ang mga rekord sa bangko ug Statement of Assets, Liabilities and Net Worth o SALN.
Samtang, gikuwestiyon ni Barbers ang posibilidad nga moabot sa 90 ang mga saksi sa depensa, tungod kay ang maong ihap naglangkob sa upat ka artikulo sa impeachment, lakip ang tulo nga wala na ipadayon.
Matud niya, ang Article II bahin sa gipasangil nga dili mapasabot nga bahandi ni Duterte maoy nagpabiling sentro sa kaso.
Gipahayag usab ni Barbers nga kinahanglan limitahan ang panahon sa pagpresentar sa depensa aron malikayan ang paglangan sa proseso, samtang hatagan gihapon kini og higayon sa pagtubag sa mga alegasyon batok sa bise presidente.