Gikwestiyon ni defense counsel Atty. Mark Vinluan ang Anti-Money Laundering Council (AMLC) Executive Director nga si Atty. Ronel Buenaventura kung adunay rekord ang AMLC nga nagpakita kung pila sa mga remittance nga nadawat sa Cale88 Foods Corporation ang direktang nakabenepisyo kang Vice President Sara Duterte ug iyang bana nga si Atty. Manases Carpio.
Matud ni Buenaventura, wala sa mga rekord sa AMLC ang maong impormasyon.
Gipangutana usab ni Vinluan kung adunay nakita ang AMLC nga ebidensya nga ilegal ang mga kompanyang nalambigit sa maong mga transaksyon.
Gipasabot ni Buenaventura nga wala’y rekord ang ahensya nga nagpakita nga ilegal nga business entities ang mga kompanyang nalambigit sa mga remittance.
Gipahayag usab niya nga wala’y rekord ang AMLC nga adunay money laundering case batok sa Cale88 Foods Corporation o sa mga opisyal niini.
Ang maong pagpatin-aw nahitabo atol sa cross-examination ni Vinluan kang Buenaventura sa Senate Impeachment Court, diin gipangutana ang AMLC bahin sa mga rekord sa pinansyal nga transaksyon nga nalambigit sa impeachment case ni Vice President Sara Duterte.
Samtang, gipunting ni Senator-judge Risa Hontiveros ang mga koneksyon sa pipila ka Chinese companies nga nalambigit sa kapin P319 milyon nga mga transaksyon ngadto sa Cale88.
Lakip sa mga kompanya nga iyang gihisgutan ang pipila nga giingong state-owned enterprises sa China.
Gipunting ni Hontiveros nga importante ang maong mga koneksyon sa pagtan-aw sa gigikanan ug daloy sa mga kuwarta nga misulod sa Cale88.
Bisan pa niini, ang AMLC nagpabiling klaro nga wala kini’y rekord nga nagpakita nga ang maong mga remittance direktang nakabenepisyo kang Duterte ug Carpio, o nga adunay money laundering case batok sa Cale88 ug mga opisyal niini.
Ang maong mga rekord kabahin sa mga financial evidence nga gipresentar sa impeachment trial ni Vice President Sara Duterte ubos sa Article II nga naglakip sa mga alegasyon may kalabotan sa iyang mga pinansyal nga transaksyon.