Gipaabot nga ipaatubang diha sa Senate Impeachment Court karong semanaha si Davao City Mayor Sebastian “Baste” Duterte ug kanhi Senador Antonio Trillanes IV isip mga testigo sa prosecution batok kang Vice President Sara Duterte may kalabutan sa Article 2 o ang giingong dili maipasabut nga propedad ug mga pagkulang sa iyang Statement of Assets, Liabilities, and Net Worth (SALN).
Gipagawasan na og subpoena si Mayor Baste aron moatubang sa korte karong adlawa, Lunes, diin usisaon kini bahin sa ₱34 milyon nga kontrata sa Dakbayan sa Dabaw ngadto sa Jencorp Industries Incorporated nga gideklara sa Bise Presidente sa iyang SALN. May kalabutan niini, gipahayag ni Trillanes nga ang maong kompanya gipanag-iyahan sa usa ka Chinese national.
Samtang gihangyo usab sa prosecution ang pagpaatubang kang Trillanes may kalabutan sa iyang pasangil nga adunay joint bank accounts si VP Sara ug kanhi Presidente Rodrigo Duterte diin misulod ang kapin ₱2 bilyon gikan tuig 2003 hangtod 2016. Una nang gipanghimakak sa depensa ang maong mga alegasyon ug gipatugbaw nga nakalapas sa bank secrecy law ang mga giduso nga dokumento.
Gilauman usab nga ipaatubang ang Executive Director sa Anti-Money Laundering Council (AMLC) diha sa nagpadayon nga pagdinig. Sugod karong adlawa hangtod sa Oktubre 15, magpadayon ang paglitis gikan Lunes hangtod Biyernes, samtang magsugod na ang tibuok adlaw nga hearing gikan alas-10 sa buntag hangtod alas-7 sa gabii sugod karong Oktubre 1.