Gipahigayon kagahapong adlawa sa Senate Impeachment Court ang pagkonsulta sa mga Amicus Curiae bahin sa voting threshold alang sa impeachment trial ni Vice President Sara Duterte.
Mitambong ang mga kanhing mahistrado nga sila Ex-Chief Justice Artemio Panganiban, Ex-Chief Justice Reynato Puno ug Ex-Supreme Court Associate Justice Adolfo Azcuna, samtang si Ex-Chief Justice Hilario Davide Jr. mipresentar sa iyang posisyon pinaagi sa legal memorandum.
Matud ni Davide, Panganiban ug Puno, dili awtomatikong 16 ka boto ang gikinahanglan alang sa pagkondena kang Vice President Sara Duterte, tungod kay mahimong magdepende ang pagkwenta sa gidaghanon sa mga senador nga legal nga kwalipikadong mobotar.
Gipadayag usab ni kanhing Supreme Court Chief Justice Artemio Panganiban ang iyang dakong kabalaka bahin sa kamatuoran ug kamahinungdanon sa patas nga proseso sa pagbotar sa mga senador.
Gihagit sa kanhing Punong Mahistrado ang sistema kung sakto ba nga tugotan nga makadesisyon ug makabotar ang mga lehislador nga absent, nagtago sa balaod, nakadetene, nagsakit, o gani naa sa laing nasod.