Misaka og 6% ang kinatibuak-ang assets sa sektor sa thrift banking sa Pilipinas, nga nakab-ot ang ₱1.10 trilyon hangtod Disyembre 31, 2024, sumala sa Chamber of Thrift Banks (CTB).
Sa usa ka opisyal nga pamahayag niadtong Martes, giingon sa CTB nga ang maong pagtubo gisangpot sa mas kusog nga lending activity ug pinalapad nga suporta sa mga micro, small, ug medium enterprises (MSMEs) ingon man sa sektor sa panimalay o housing.
Ang loan portfolio sa mga thrift bank misaka og 14.7% ngadto sa ₱777.28 bilyon—timaan sa padayon nilang paningkamot sa pagpalapad sa access sa pinansyal nga serbisyo alang sa kadaghanan.
Samtang ang deposit liabilities misaka sab og 4.7% ngadto sa ₱826 bilyon, samtang ang kapital sa sektor natala sa ₱174 bilyon, nga adunay capital adequacy ratio nga 17.88%—usa ka indikasyon sa lig-on nga kapasidad pinansyal labi na tuig 2025.
Bisan pa sa mga hagit sa gawas, napadayon sa sektor ang usa ka manageable nga non-performing loan (NPL) ratio nga 6.67%, nga nagpakita sa maayo nga pagdumala sa credit risk.
Gipadayag sa CTB ang ilang padayon nga paningkamot sa pagpanguna sa inclusive growth pinaagi sa suporta sa MSMEs ug industriya sa panimalay, diin ang thrift banks nagpabiling sukaranan nga kabahin sa ekonomiya sa nasud.