Nakuha sa Malaybalay City Fire Station ang dungog nga Best City Fire Station of the Year sa tibuok Rehiyon 10 sa ikaduha nga sunod-sunod nga tuig, samtang nahimutang usab kini sa ika-upat nga pwesto sa tibuok nasod.
Sa pakighinabi sa Bombo Radyo Malaybalay, gipahayag ni City Fire Marshal Chief Inspector ( CINSP ) Lloyd Villaroya nga ang maong pag-ila gumikan sa pagpaningkamot sa iyang 42 ka personahe, suporta sa kagamhanan sa dakbayan sa pagpanguna ni Mayor Jay Warren Pabillaran, ug sa suporta sa media alang sa pagpaubos sa insidente sa sunog.
Taliwala sa maong kalampusan, padayon usab ang pangandam sa yunit sa kabomberyohan batok sa hulaw pinaagi sa pagpahigayon og matag adlaw nga water rationing sa mga dapit nga nihit ang supply sa tubig, uban sa pakigtambayayong sa CENRO alang sa pagpugong sa sunog sa kabukiran.