Gikuwestiyon ni Davao City 1st District Representative Paolo “Pulong” Duterte ang posibilidad nga 10 ka boto lamang ang gikinahanglan aron baliktaron ang unang ruling nga nagtakda og 16 ka boto aron ma-convict si Vice President Sara Duterte sa impeachment trial.
Ang isyu bahin sa voting threshold unang misamot human gikuwestiyon sa Senado kung kinahanglan bang magpabilin ang 16-vote requirement, subay sa pag-absent sa pipila ka senator-judges sa impeachment proceedings.
Samtang, giinsistir ni Pulong Duterte nga dili basta-basta gamiton ang mas ubos nga ihap sa boto aron malapas ang constitutional requirement.
Matud pa niya, posibleng igo ang 10 ka boto alang sa usa ka procedural question kung mao kini ang gitakda sa Senate rules, apan dili kini nagpasabot nga mahimong usbon pinaagi niini ang constitutional requirement.
Sa pikas bahin, kinahanglan og klaripikasyon sa Senado ang basehan sa two-thirds vote alang sa impeachment trial ni Vice President Sara Duterte, ilabi na sa pagkwenta sa mga senador nga wala makatambong o dili makapartisipar sa mga pagdungog.
Matud sa abogado nga si Atty. Neri Colmenares, dili angay iapil ang mga absent nga senador tungod kay wala sila mismo nakadungog sa mga ebidensya ug testimonya nga mahimong basihan sa paghukom.