Nakarekord sa Cash Disbursement Record o CDR ang pag-release sa confidential funds kang Colonel Raymund Dante Lachica niadtong Disyembre 2022, sumala sa kanhi Special Disbursing Officer sa Office of the Vice President nga si Gina Acosta.
Atol sa impeachment trial, gipangutana si Acosta ni prosecution counsel Atty. Amando Virgil Ligutan bahin sa Cash Disbursement Record kon CDR nga gikinahanglan tipigan sa Special Disbursing Officer alang sa mga invoice, resibo, voucher ug mga kwarta nga gipagawas matag adlaw.
Gitin-aw usab ni Ligutan ang kalainan tali sa internal acknowledgment receipt nga gipirmahan ni Lachica ug sa mga acknowledgment receipt sa mga tawo nga giingong nakadawat sa kwarta atol sa confidential operations.
Sumala ni Acosta, ang mga acknowledgment receipt gikan sa mga tawo nga nakadawat o gigastohan ni Lachica gitipigan ug gisumite na alang sa audit.
Giangkon usab ni Acosta nga bahin sa iyang trabaho ang pagsusi sa daghang acknowledgment receipts nga nagdokumento kung asa napadulong ang confidential funds.
Apan tungod sa kadaghan sa mga dokumento, dili na niya mahinumdoman ang tanang detalye, lakip ang mga ngalan.
Gipresentar si Acosta sa prosecution isip hostile witness kalabot sa Article I sa impeachment case batok kang Vice President Sara Duterte, diin giakusahan ang Bise Presidente sa sistematikong sayop nga paggamit, misappropriation ug ilegal nga liquidation sa ₱500 milyon nga confidential funds sa Office of the Vice President.
Para sa prosecution, importante ang testimonya ni Acosta tungod kay nagpakita kini sa usa ka balik-balik nga pamaagi sa pagdumala sa confidential funds sa OVP diin ang kwarta itugyan ngadto sa security officer, adunay internal acknowledgment receipt nga pirmahan ug sa ulahi bawion, ug ang mga dokumento sa liquidation isumite ngadto sa Commission on Audit o COA.