Gikumpirma ni kanhi Special Disbursing Officer Gina Acosta nga pareho ang “standard operating procedure” nga gisunod sa Office of the Vice President (OVP) ug sa Davao City sa pagdumala ug pag-liquidate sa confidential funds.
Gipangutana ni Presiding Officer Senator Francis “Chiz” Escudero si Acosta kung pareho ba ang pamaagi nga iyang gisunod isip SDO sa Davao City ug sa OVP.
Gitin-aw usab ang pamaagi diin ang confidential funds i-turn over ngadto sa usa ka security officer o laing tawo nga dili bonded.
Ang maong tawo mopirma og acknowledgment receipt, ug human ma-submit ang mga dokumento sa liquidation ngadto sa Commission on Audit kon COA, kuhaon pag-usab ang maong acknowledgment receipt.
Matud usab sa prosecution counsel nga si Atty. Amando Virgil Ligutan nga posibleng nagpakita kini og balik-balik nga pamaagi o “modus operandi” sa pagdumala sa confidential funds.
Apan giusab ni Escudero ang pangutana ug gigamit ang termino nga “standard operating procedure” aron malikayan ang laing kahulugan sa “modus operandi.”
Una nang gikumpirma ni Acosta nga si Colonel Raymund Dante Lachica, kanhi lead security officer sa OVP, maoy mikuha pag-usab sa mga internal nga dokumento nga iyang gipirmahan isip acknowledgment sa pagdawat sa upat ka ₱125-milyong cash tranche gikan sa confidential funds.
Tungod niini, mitumaw ang pangutana kung ang maong pamaagi usa lamang ka kahikayan sa OVP o usa ba kini ka praktis nga nadala gikan sa panahon ni Vice President Sara Duterte isip mayor sa Davao City.
Sumala sa mga report nga nakabase sa mga dokumentong gisumite sa COA, kapin ₱2 bilyon ang natigom nga confidential ug intelligence funds sa Davao City gikan 2016 hangtod 2022, diin misaka ang tinuig nga alokasyon gikan sa ₱144 milyon niadtong 2016 ngadto sa ₱460 milyon matag tuig gikan 2019 hangtod 2022.