Gitin-aw sa House Prosecution Panel nga dili sila manghilabot sa fraud audit nga pagahimoon sa Commission on Audit (COA) kabahin sa confidential funds sa Office of the Vice President ug Department of Education.
Gipasabot ni House Prosecution Panel Spokesperson Atty. Benjamin Tolosa Jr. nga walay direktang epekto ang maong audit sa impeachment proceedings batok kang Vice President Sara Duterte, lakip na sa timeline sa pagdungog sa kaso.
Matud ni Tolosa nga kon adunay makita ang COA nga fraud o iregularidad sa paggamit sa confidential funds, mahimo kining ipasa ngadto sa Ombudsman alang sa posibleng criminal case.
Gihatagan usab og gibug-aton ni Tolosa nga ang fraud audit nagtutok sa posibleng criminal liability tungod sa sayop nga paggamit o paggasto sa pondo, samtang ang impeachment trial nagtutok sa fitness to remain in office o kung angay pa bang magpabilin si Vice President Duterte isip ikaduhang pinakataas nga opisyal sa nasod.