Anaa na sa katapusang bahin ang kasabutan tali sa Iran ug Oman alang sa pagbutang og bag-ong shipping lanes sa Strait of Hormuz, apan gitin-aw sa Tehran nga magdepende gihapon sa Estados Unidos ang hingpit nga pag-abli pag-usab sa maong agianan.
Sumala kay Iranian Foreign Minister Abbas Araqchi, gihan-ay na ang mga bag-ong agianan sa mga barko, apan kinahanglang unang i-alsa sa US ang mga sanction ug blockade, ihunong ang mga hulga sa militar, ug maghatag og bayad-damyos sa gubat sa dili pa ibalik ang normal nga pagbiyahe sa dagat.
Sa laing bahin, gipahayag sa usa ka opisyal sa US nga andam usab ang Washington nga makuha ang blockade sa mga dunggoanan sa Iran kon masiguro ang luwas ug walay balakid nga pamatigayon sa kadagatan, samtang nagpadayon ang pagbayloay og mensahe sa duha ka nasod pinaagi sa mga intermediary.