Nagsugod na sa pagkadunot ang usa ka wala pa mailhing patay’ng lawas sa lalaki nga napalgan sa sapa sulod sa pinyahan sa Field 11, Bugtungan, Purok 6, Barangay Poblacion, lungsod sa Libona, Lunes sa hapon, Agosto 3.
Unang nadiskobrehan ang biktima sa duha ka maintenance worker sa Del Monte Philippines Inc. (DMPI) nga sila si Kent Jay, 28, ug Mark Christian, 43 anyos. Daling miresponde sa dapit ang mga sakop sa Libona Municipal Police Station (MPS) sa pagpangulo ni PCPT Erwin James D. Tabequero, OIC, human makadawat og tawag gikan sa usa ka concerned citizen pasado alas 3:40 sa hapon.
Walay bisan unsa nga sapot ang biktima dihang nakaplagan sa tunga sa sapa. Gibanabana nga nag-edad kini og 35 hangtod 40 anyos, adunay gitas-on nga 5’4″, medium build, ug adunay marka sa tattoo nga “ALPHA KAPPA RHO” ug “Janfrit” sa iyang lawas.
Sa kasamtangan, nanawagan ang Libona MPS sa kinsa kadtong adunay nawala nga kabanay o nakakilala sa deskripsyon sa biktima nga makipag-alayon o moduol dinalian sa ilang buhatan aron mailhan ang maong patay’ng lawas.