Gidunggab sa usa ka 25-anyos nga silingan ang usa ka 56-anyos nga lalaki human miulbo ang ilang daang panagbingkil atol sa gipahigayon nga fiesta sa Zone 1, Barangay Kalasungay, Malaybalay City, pasado alas 10:15 sa gabii, Hulyo 31.
Giila ang biktima nga si Pedrito, habig ang suspek mao si Michael Jun, nga parehong molupyo sa maong dapit. Base sa imbestigasyon sa Malaybalay City Police Station (CPS), nag-inom ang biktima sa nataran sa silingan nga si Emmie dihang miabot ang suspek nga nakainom ug nagpahayag nang daan sa intensyon nga magpanimalos tungod sa daang away sa iyang paryente.
Pila ka minuto ang milabay, kalit nga gidunggab sa suspek ang biktima gamit ang kutsilyo. Naangkon ni Pedrito ang mga samad sa nawong, luyo, ug sa wala nga bukton, hinungdan nga daling gidala kini sa Bethel Hospital diin nagpabilin kining gi-obserbahan sa mga doktor.
Human sa maong aksyon, miboluntaryong mitahan si Michael Jun sa kapulisan samtang narekober usab sa mga otoridad ang kutsilyo nga gigamit sa krimen. Kasamtangang naa na sa kustodiya sa Malaybalay CPS ang suspek alang sa ipasaka nga angayang kaso.