Kapin sa ₱102,000 nga balor sa gitudlong shabu ang nasakmit sa kapulisan sa Bukidnon human nadakpan ang duha ka mga suspek sa managlahing buy-bust operation sa Valencia City ug Maramag, Bukidnon.
Unang nadakpan sa Sitio Saguing, Barangay Lumbo, Valencia City ang usa ka 44-anyos nga giilang si Alyas Renan. Nakumpiska gikan kaniya ang tulo ka sachet sa gituohang shabu nga nagtimbang og 8.1 ka gramo nga nagkantidad og ₱55,080, lakip ang cellphone ug buy-bust money.
Pila ka oras ang nakalabay, natigayon usab ang laing operasyon sa Purok 1, North Poblacion, Maramag, diin nadakpan ang 24-anyos nga si Alyas Bro Bro. Nasakmit gikan sa suspek ang lima ka sachet nga shabu nga nagtimbang og 7.0 ka gramo nga nagkantidad og ₱47,600, kauban ang usa ka digital weighing scale.
Sa kasamtangan, ang duha ka suspek pulos na pormal nga mag-atubang ang kasong paglapas sa Section 5 ug 11 sa Republic Act 9165 o Comprehensive Dangerous Drugs Act of 2002.