Boluntaryong mitahan ang duha ka kanhing miyembro sa Communist Terrorist Group (CTG) ngadto sa Police Regional Office-10 (PRO-10), nga nagpadayon sa pagkunhod sa nahibiling pwersa sa grupo sa Northern Mindanao.
Nahitabo ang pagsurender niadtong milabay’ng adlaw sa headquarters sa 1003rd Maneuver Company, Regional Mobile Force Battalion 10 (RMFB-10) sa Sitio Colon, Barangay Halapitan, San Fernando, Bukidnon.
Ang duha ka misurender giilang mga sakop sa Militia ng Bayan ubos sa Headquarters Force–North Eastern Operation (HQF-NEO) sa North Central Mindanao Regional Committee (NCMRC).
Gitugyan usab nila ang duha ka homemade 12-gauge shotgun ug lima ka bala sa 12-gauge shotgun. Ang operasyon nahimong malampuson pinaagi sa hiniusang paningkamot sa 1003rd Maneuver Company ug sa ubang yunit sa Philippine National Police ug Armed Forces nga mitabang sa pagpatuman sa kampanya batok sa insurhensiya.
Sa pagkakaron, ubos na sa kustodiya sa 1003rd Maneuver Company ang duha ka kanhing rebelde alang sa custodial debriefing ug profiling isip kabahin sa proseso sa ilang pagsurender.
Padayon usab ang PRO-10 sa pag-awhag sa nahibiling mga sakop sa CTG nga biyaan ang armadong pakigbisog ug mopahimulos sa mga programa sa gobyerno alang sa malinawon nilang pagbalik sa komunidad.