Mukabat sa kapin 1.2 bilyon pesos ang gigahin sa lokal nga kagamhanan sa dakbayan sa Valencia, Bukidnon alang sa pagpatuman sa nagkadaiyang dagkong proyekto sa inprastruktura—sama sa flood control, drainage system, ug bag-ong City Hall—aron masulbad ang problema sa pagbaha ug mapalambo ang serbisyo sa siyudad.
Pinaagi sa usa ka eksklusibong pakighinabi sa Bombo Radyo Malaybalay kang Atty. Heinz G. Villanueva, kinsa nagrepresenta sa lokal nga kagamhanan sa Valencia, gipadayag niini ang gipahigayon nga mga pangandam alang sa kaugmaon sa siyudad sa pakigtambayayong ubos sa pagdumala sa mayor sa maong siyudad.
Gawas sa flood control, gitakda usab ang Php 20 milyon alang sa pagpaayo sa drainage system gikan sa 20% Local Development Fund (LDF), diin na-bid out na ang Php 4 milyon ug mosunod ang Php 16 milyon nga bahin.
Subay niini, mag-abli usab ang kagamhanan sa bidding para sa Php 209 milyon nga 8-kilometros nga Guinoyoran Junction Farm-to-Market Road nga gilaumang makahatag og dako nga kaayohan sa lima ka barangay, lakip na ang Barangay Concepcion.
Samtang alang sa mas hamugaway nga paghatag og serbisyo sa publiko, gipahigayon na ang ceremonial signing alang sa pagtukod sa bag-ong 5-hektaryas nga New City Hall sa Diversion Road nga adunay gahin nga Php 1 bilyon, ug gilaumang masugdan ang bidding sa maong dako nga proyekto sa sunod nga tuig.