Gikabalak-an sa United Nations (UN) nga kapin sa 500 ka Rohingya refugees ang nangamatay human sa gikatahong pagkalunod sa duha ka bangka sa kadagatan sa nasod sa Myanmar.
Subay sa hiniusang taho sa International Organization for Migration (IOM) ug UNHCR, ang mga biktima misulay sa paglayas gikan sa kapintasan sa Myanmar ug sa huot nga mga kampo sa Bangladesh aron unta modangop sa mga silingang nasod sama sa Malaysia, Indonesia, o Thailand.
Giingong nawad-an og kontak ang unang bangka nga may sakay nga gibanabanang 250 ka tawo, samtang ang ikaduhang bangka nga adunay 280 ka pasahero ang gituohang hingpit nga nalunod sa baybayon sa Ayeyarwady niadtong Hulyo 8. Gibutyag sa UN nga mibiyahe ang mga biktima taliwala sa masungit ug peligroso kaayong dagan sa kadagatan tungod sa kusog nga ulan ug baha sa rehiyon.