Nihangyo ang Department of Agriculture (DA) nga pakusgan pa ang proteksyon sa mga matang nga produkto sa ube sa nasud taliwala sa nagkadakong panginahanglan niini sa tibuok kalibutan.
Pinaagi sa Bureau of Plant Industry (BPI) ug National Seed Industry Council–Plant Variety Protection Office (NSIC-PVPO), nagtigom ang ahensya uban sa mga stakeholders aron mapatuman ang mas hugot nga intellectual property safeguards alang sa ube sa Pilipinas.
Sa pagkakaron, adunay walo ka narehistro nga klase sa ube sa nasud, apan gipangandaman na sa DA ang pagkuha og sertipikasyon gikan sa Intellectual Property Office of the Philippines (IPOPHL) aron mapanalipdan ang tatak nga “Philippine Ube.”
Gawas sa proteksyon sa maong produkto, nanawagan usab ang mga eksperto sa dugang pondo ug pamuhunan alang sa panukiduki ug tissue culture propagation niini aron makahimo og mas dekalidad ug walay sakit nga mga liso nga ikasustiner sa industriya.