Dili na ipatawag pa sa prosekusyon isip mga testigo si Atty. Zuleika Lopez, ang Chief of Staff ni Vice President Sara Duterte, kauban si Captain Belinda Bello. Kini ang opisyal nga gikumpirma sa panel sa pagtapos sa ika-limang (5th) adlaw sa impeachment trial kagahapon, samtang pormal nga sugdan ang ika-unom (6th) nga adlaw sa pagdungog karong adlawa. Gipasabot ni private prosecutor Lorna Kapunan nga “unnecessary ug redundant” na ang pagpa-testigo sa duha kalabot sa Article 4 sa impeachment case, o ang isyu sa grave threats ug assassination plot batok sa Pangulo.
Sa pikas bahin, gipangulohan sa miaging adlaw ang pag-atubang ni NBI BARMM Regional Director Atty. Jeremy Lotoc. Gipaniguro ni Lotoc nga base sa ilang visual analysis, tinuod ug dili AI, fabricated, o spliced ang viral video sa pagpanghulga sa bise presidente batok sa Unang Pamilya ug kang kanhi Speaker Martin Romualdez.
Sa dihang gipangutana ni Senator Win Gatchalian kon duna ba’y kapasidad si VP Sara nga tumanon ang iyang hulga, gitubag ni Lotoc nga gawas sa iyang gahum isip bise presidente, makita usab kini sa background sa iyang amahan nga si kanhi Presidente Rodrigo Duterte nga nag-atubang karon og kaso sa International Criminal Court (ICC).
Tungod kay walay isalang nga testigo karong adlawa, gilaumang mag-atubang sa usa ka init nga debate ang prosekusyon ug depensa. Sentro niini ang desisyon sa impeachment court kon tugotan ba ang hangyo sa prosekusyon nga ipasubpoena ang mga bank, AMLAC, ug BIR records ni VP Sara ug sa iyang bana aron mabusisi ang giingong kahina-hinalang transaksyon ug alegasyon sa tagong yaman.