Nakabsan sa kinabuhi ang 26-anyos nga Colombian national human gipusil sa mga ahente sa U.S. Immigration and Customs Enforcement (ICE) atol sa usa ka operasyon sa Biddeford, Maine, sa Estados Unidos niining Martes sa buntag.
Ang biktima giila nga si Joan Sebastian Guerrero, nga sumala sa mga taho adunay awtorisasyon sa pagtrabaho sa Estados Unidos ug adunay Social Security number.
Matud sa mga immigrant advocates, padulong sa iyang trabaho uban sa iyang tulo ka tuig nga anak sa dihang giatubang kini sa mga ahente sa ICE.
Sumala sa Department of Homeland Security (DHS), misulay og ikyas si Guerrero ug gipadagan ang iyang sakyanan padulong sa usa ka ahente, hinungdan nga gipusil kini.
Apan, giingon sa mga saksi nga ilang nakita ang usa ka ICE SUV nga mibangga sa iyang sakyanan sa makadaghang higayon sa wala pa kini gipusil. Usa ka silingan usab ang miingon nga nadungog pa niya si Guerrero nga nagaingon og, “But I tried to stop.”
Walay body camera nga gigamit sa mga ahente atol sa insidente, maong padayon nga gipangayo sa pamilya ug mga migrant rights advocates ang hingpit nga imbestigasyon aron masuta ang tinuod nga nahitabo.
Gibutang na sa administrative leave ang ahente nga nagpabuto samtang nagpadayon ang imbestigasyon sa Federal Bureau of Investigation (FBI) ug sa Maine Attorney General’s Office. Sumala sa mga taho, ikaduha na kini nga insidente sulod sa unom ka adlaw diin adunay namatay sa pagpamusil nga nalambigit sa operasyon sa ICE batok sa mga sakyanan.