Tingkagol na karon sa selda sa kapolisan ang giila nga Top 6 Most Wanted Person sa provincial level human kini nasikop sa gikasang anti-illegal drug operation didto sa Purok 12, South Poblacion, Maramag, Bukidnon.
Sa report ni Bukidnon Police Provincial Office Director PCOL Oliver Sotto Navales ngadto kang Regional Director PBGEN Christopher Nortez Abrahano, giila ang suspetsado nga si Henry Uy Guiritan Jr., alyas “Dodi”, 33 anyos, ug residente sa maong lungsod. Ang malampusong manhunt operation gipangunahan sa Maramag Municipal Police Station ubos ni OIC PLTCOL Hope Mark Orbuda, kauban ang nagkadaiyang intelligence ug mobile force units sa probinsya ug rehiyon.
Nasikop ang suspetsado pinaagi sa gahum sa Warrant of Arrest nga pinetsahan niadtong Hunyo 25, 2026, tungod sa kalapasan sa Section 5 ug Section 11 sa Republic Act 9165 o Comprehensive Dangerous Drugs Act of 2002. Walay girekomendang piyansa ang korte alang sa iyang temporaryong kagawasan, ug sa kasamtangan nagpabilin kini sa kustodiya sa Maramag MPS alang sa saktong disposisyon.