Niabot na sa Doha, Qatar si US Special Envoy Steve Witkoff kauban si Jared Kushner alang sa mga importanteng tigom kalabot sa kasabutan tali sa Estados Unidos ug Iran, apan giklaro sa mga otoridad nga walay plano alang sa usa ka direktang face-to-face nga panag-istoryahanay tali sa duha ka bahig.
Kini nga lakang nahitabo human gipahayag ni US President Donald Trump nga duna’y “importante” nga panagtigom nga mahitabo, sunod sa nahitabong serye sa pinusilay ug kagubot didto sa Strait of Hormuz sa milabay nga mga adlaw. Bisan pa man niini, gipanghimakak usab sa mga opisyal sa Iran nga duna’y pormal nga negosasyon nga nakalinya tali kanila ug sa US.
Imbis nga mag-atubangay, ang mga technical team sa US ug Iran gilauman nga makigtagbo sa managlahing higayon ngadto sa mga tigpataliwala (mediators) gikan sa Qatar ug Pakistan. Tumong sa maong indirect talks nga masigurong mapatuman ang mga kondisyon sa kasamtangang memorandum of understanding (MoU) aron mapugngan ang dugang nga gubat ug tugotan nga makalabay nga luwas ang mga commercial nga barko sa dagat.