Naghimo og usa ka espesyal nga “chain mail” o baluti nga hinimo sa hait nga plastic net ang usa ka mag-uuma sa Austria aron mapanalipdan ang iyang mga karnero batok sa makamatay nga pag-atake sa mga lobo o wolves.
Si Rudolf Schaubach nakahunahuna sa maong imbensyon tungod sa nagkadaghang kaso sa pag-atake sa mga lobo sa Austria ug sa silingang Germany.
Ang iyang gihimo usa ka gaan nga baluti nga adunay mga hait nga tunok apan nagtugot gihapon sa mga karnero nga makalihok ug makakaon og normal.
Nagtuo siya nga ang mga tunok makapugong sa mga lobo sa pagpaak ug pag-atake.
Apan, nasugatan ang imbensyon og daghang pagsupak gikan sa publiko ug sa ubang mga mag-uuma.
Matod sa usa ka mag-uuma nga nag-atiman og kapin 1,000 ka karnero, dili kini praktikal ug posible pang makadaot tungod kay mahimong masangit ang balhibo sa mga karnero.
Gipasidan-an usab nga basin usbon lang sa mga lobo ang ilang pamaagi ug atakihon ang ulo ug mga bitiis sa hayop.
Gipunting usab sa mga grupo sa agrikultura nga dili kini praktikal sa gasto kon gamiton sa liboan ka mga karnero.
Bisan pa niini, gibarugan ni Rudolph ang iyang imbensyon ug miingon nga gihukman lamang kini base sa mga litrato.
Bisan wala pa kini masulayi sa tinuod nga pag-atake sa mga lobo, malampuson na kining gisul-ob sa usa ka karnero sulod sa pipila ka adlaw nga walay nahitabong problema.
Tungod sa nagkadakong kontrobersiya, temporaryong gihunong ni Rodulph ang trial sa Austria ug nangita karon og laing lugar aron ipadayon ang iyang proyekto.