Gipresentar sa gobyerno ang ₱7.2 trilyong nasudnong badyet alang sa 2027, nga mas taas og unom ka porsyento kumpara sa ₱6.793 trilyon nga badyet karong tuiga, bisan pa sa pagpaubos sa target sa pagtubo sa ekonomiya ug gipaabot nga kita sa gobyerno.
Sumala sa Department of Budget and Management (DBM), limitado ang fiscal space sa gobyerno tungod sa mga obligadong gastuhon sama sa National Tax Allotment, pagbayad sa utang, ug uban pang mandatory expenditures.
Gipasabot usab sa DBM nga naapektuhan ang pag-andam sa badyet tungod sa giingong mga anomalya sa flood control projects, ingon man sa tensyon tali sa Estados Unidos, Israel, ug Iran, ug sa hulga sa El Niño ug climate change, nga nakaapekto sa ekonomiya ug sa kapasidad sa gobyerno sa pagkab-ot sa target nga kita ug economic growth.
Tungod niini, gipaubos sa Development Budget Coordination Committee (DBCC) ang target sa pagtubo sa ekonomiya karong tuiga ngadto sa 3.5% hangtod 4.5%, gikan sa kanhing 5% hangtod 6%, human mitubo lamang og 2.8% ang ekonomiya sa unang quarter nga ang pinakahinay nga pagtubo sulod sa miaging lima ka tuig.