Napatay sa sunod-sunod nga engkwentro batok sa kagamhanan ang usa ka giingong high-ranking official sa New People’s Army (NPA) ug laing usa ka miyembro niini sa magkalahing dapit sa probinsya, pasado alas-1:00 sa kaadlawon karung adlawa, Dominggo, Hunyo 21.
Ang maong opisyal, nga giingong sakop sa North Central Mindanao Regional Committee (NCMRC), napatay human maka-engkwentro sa 8th Infantry “Dependable” Battalion (8IB) didto sa Sitio Nalumosan, Barangay Silae, ning siyudad sa Malaybalay. Human sa pinusilay, narekober sa kasundalohan ang patay’ng lawas sa wala pa nganling lider, duha ka armas, ug mga personal nga gamit niini.
Gibutyag ni LTC Jorge Jallorina, ang Commanding Officer sa 8IB, nga duna’y duha ka hugna ang nahitabong operasyon. Unang naka-engkwentro sa mga sakop sa Special Forces (SF) ang maong grupo didto sa Sitio Tagip-tagip, Barangay Poblacion, Cabanglasan diin napatay ang unang rebelde. Sa dihang gipanglakag sa militar ang mga miikyas nga kauban niini, miatras sila paingon sa hilit nga bahin sa Malaybalay City diin sila nakorner sa naka-abang nga pwersa sa 8IB.