6.3 magnitude nga linog miigo sa China, 1 patay!

Usa ang patay samtang upat ang nasamdan human miigo ang magnitude 6.3 nga linog sa Qinghai Province sa amihanang-kasadpang China niadtong milabay’ng adlaw.

Gilayon nga gipakatap sa mga awtoridad ang mga rescue team aron pangitaon ang posibleng mga natanggong ug susihon ang kadaot sa apektadong mga lugar.

Sumala sa China Earthquake Networks Centre, nahitabo ang linog takna  alas 5:06 sa hapon sa Haixi Prefecture ug adunay giladmon nga 10 kilometro.

Kapin sa 320 ka rescue personnel ang gipakatap sa operasyon, samtang padayon usab ang pagmonitor sa mga aftershocks.

Naghatag na usab ang gobyerno og mga tolda, habol, pagkaon ug tubig alang sa mga residenteng naapektuhan sa linog.