Gipagawas na sa Department of Energy (DOE) ang price range alang sa posibleng pagtaas o pagkunhod sa presyo sa mga produktong petrolyo nga ipatuman sa mga kompanya sa lana karong adlawa, Hunyo 16.
Base sa gi-isyu nga price range sa DOE, ang presyo sa gasolina mahimong moubos og 32 sentimos matag litro o mosaka hangtod ₱1.68.
Samtang, ang diesel posibleng makasinati sa dakong rollback diin mahimo kining moubos gikan ₱3.71 hangtod ₱5.71 matag litro.
Ang kerosene usab gilauman nga moubos ang presyo gikan 50 sentimos hangtod ₱2.50 matag litro.
Gipahinumdoman sa DOE ang mga kompanya sa lana nga kinahanglan sundon ang gitakdang price range ug dili molapas sa limitasyon nga gitakda sa ahensya.
Naglaum usab ang DOE nga magpadayon ang pagkunhod sa presyo sa petrolyo, ilabina human ipahibalo sa Estados Unidos nga adunay gihimong kasabutan aron matapos na ang kagubot ug gubat sa Middle East.