Nadugangan na usab ang listahan sa talagsaong world records sa usa ka lalaki sa Germany nga nailhan tungod sa iyang talagsaong mga hagit sa paspas nga pagkaon ug pag-inom.
Malampuson nga nakuha ni Andre Ortolf ang Guinness World Record alang sa “pinakadaghan nga dugos nga nakonsumo sulod sa usa ka minuto.”
Nahimo ang record-breaking attempt sa siyudad sa Augsburg, Bavaria, diin walay kalisod nga nahurot ni Andre ang 1,273 gramos (44.91 ounces) nga dugos sulod lamang sa usa ka minuto.
Gawas sa iyang bag-ong titulo, nailhan usab si Andre sa daghang uban pang world records sa speed eating ug speed drinking.
Lakip niini ang pinakapaspas nga pag-inom sa usa ka botelya sa chili sauce sulod sa 7.84 segundos, ug ang pinakadaghan nga ice cream nga nakaon sulod sa 30 segundos nga miabot sa 568 gramos.
Dili usab siya pahabilin sa pag-inom, kay narekord usab niya ang pinakapaspas nga pag-inom sa usa ka litro nga tomato juice sulod sa 55.21 segundos, usa ka litro nga lemon juice pinaagi sa straw sulod sa 13.30 segundos, ug usa ka litro nga lime juice pinaagi sa straw sulod sa 13.51 segundos.