MALAYBALAY CITY — Nakaplagang wala na’y kinabuhi ang usa ka 56-anyos nga security guard sulod mismo sa nakatrangka nga guardhouse sa DPWH Depot sa Purok 17, Barangay Casisang, ning siyudad, sayo sa buntag karong Lunes, Hunyo 15.
Subay sa imbestigasyon sa Malaybalay City Police Station, nadiskubrehan ang biktima sa iyang kaubang guwardiya alas 6:44 sa buntag human kini wala na motubag sa dihang gitawag pinaagi sa bintana alang sa ilang pormal nga shifting. Nasayran nga nagsugod ang duty sa biktima alas 7 sa buntag niadtong Hunyo 14 ug kasamtangan na untang motapos sa iyang 24-oras nga shift sa trabaho.
Sa pagsulod sa mga mirespondeng pulis, nakit-an ang biktima nga naglingkod gihapon sa lingkuranan diin duna pa’y nakataod nga nebulizer sa iyang nawong. Nakaplagan usab sa sulod ang mga tambal sa hika ug usa ka plastik nga balde nga adunay sulod nga laway, hinungdan nga dako ang pagtuo nga giatake kini sa iyang sakit nga hubak.
Gikumpirma sa kapulisan nga gawasnon sa bisan unsang timailhan sa foul play o dautang binuhatan ang maong trahedya. Gidala na ang patay’ng lawas sa biktima ngadto sa Bukidnon Provincial Medical Center (BPMC) alang sa opisyal nga deklarasyon sa kamatayon ug dugang medikal nga eksaminasyon.